حاجة نرفزتني شباب عاوزين الحرق

حصل معايا موقف جنني واستفزني لدرجة اني كنت عاوزة أولع في الدنيا وفي الشباب

تقريبا الساعة واحدة الا ربع بليل يعني من ساعة تقريبا فتحت ايميل الياهو بتاعي
عادي بشوف صاحباتي أو أخويا موجودين لأن أخويا مسافر وطبعا وسيلة الاتصال هي النت وهو بيتكلم في وقت زي ده المهم خير اللهم اجعله خير لقيت واحد عاوز يكلمني ع الايميل قلتله أنا معرفكش يبقى متكلمنيش قالي طيب انت على الفيس بوك قلت لا قال أصل ايميلك عندي قلتله طيب لو سمحت امسحه ومتكلمنيش تاني قالي أنا كلمتك قبل كده وشوفت صورتك كمان ومعرفش ايه وأنا أساسا معرفش بسلامته ولا قريت عنه في طبق اليوم ولا طبق الغد حتى فضل يرغي بقى ويقول طريقتك مش كويسة ومعرفش ايه وأنا بقفل معاه علشان ميكلمنيش بعد كده والمشكلة اني كنت ناسية حكاية اني أعمل ignore خالص المهم لقيته بيقولي ممكن نتعرف قلتله يا أستاذ حط أختك مكاني وشوف لو تحب انها تكلم حد لو انت تحب كده ليها أنا أخويا ميرضاش ليا كده (قلت يمكن يعقل وربنا يهديه على ايدي بالجمله دي ويعرف ان بنات الناس مش لعبه ويفكر بعقل كده)وقلتله انا مبكلمش حد الا باذن أهلي ومحدش سمحلي اني أصاحب حضرتك وأنا مش بصاحب حد ولا بكلم ولاد ولقيته شتمني وبيقولي انتي مش محترمة وبدأ يخبط في الحلل ووقع المطبخ كله

ولقيت بسلامته بيقولي انتي شايفة نفسك ليه وطالعة فيها وبعدين أنا أختي مبتفتحش النت الساعة 2 بليل يا ست المحترمة
قلتله انت مش من حقك تسألني السؤال ده وكل واحد ليه أسبابه وقفلت الايميل وقررت اني أغيره خالص بقى ومفتحوش تاني رغم ان القرار ده كنت لسة واخداه قبل نهاية الامتحانات لأن في شباب كتير عرفو الايميل منين ؟ الله أعلم
قولولي بقى الواحد يعمل ايه مع العالم الزبالة دول؟؟ أنا دمي بيغلي يا بنات والله ومن كتر النرفزة معرفتش ارتب الكلام حتى واللي غايظني اني نسيت حكاية الignore دي خالص ومفتكرتش الا لما قفلت الياهو روحت فاتحه لقيت سيادته طبعا زي ميكون كان بيستخف دمه وفاكرني موجوده روحت عاملة ignore ونقلت الايميلات على الايميل الجديد بس لسة مكملتش ربنا يسهل في وقت الخنيق ده ميكونش موجود فيه وبصراحة أنا فعلا غلطانة لما فكرت انه ممكن يحترم نفسه ويخرس ويسيبني في حالي بزمتكو مش يستاهل الحرق برضه

للمزيد من مواضيعي

حاجه فعلا تنرفز وتخلى الواحد دمه يفور

بس للاسف مش عايز اقولك ان 90 % من الشباب العربى ذى كده واضل سبيلا مش عارف السبب ايه هل من الوقت الفاضى ولا ايه السبب مبيدخلش النت غير علشان يعمل شات ويدور على بنات يكلمها وبيتهيئله ان النت معمول علشان كده بس جهل فى جهل المهم متزعليش نفسك ويا ما هتشوفى من العينات دى وربنا يهدى الجميع ان شاء الله

جزاك الله خيرا يا دكتور على المرور
بس ليه الشباب دول ميحاولوش يستفادوا بالنت وليه محدش بيعتبر ان أي بنت زي أخته يعني يحط أخته مكانها ويشوف هيرضاه عليها ولا لأ ليه محدش بيعمل كده الا قليل ؟

السلام عليكم
طبعا اكيد اكترمن 95% كده حصل معايا كدا بس طبعا انا مدتلوش فرصه انه يخربط فى الحلل
بس طبعا الى يعيش يا ما يشوف مظنش انهم منكن يفكرو زى منتى عوزه يا لؤلؤه كل واحد فيهم همه انه يكلم البنت دى وبس ميهموش بقا ان كان يجيب لها مشاكل اولا مبتفركش معا يلا استحملى .

ميرسي على مرورك الجميل وفعلا عندك حق وعموما أنا ريحت نفسي وغيرت الايميل

هههههههههههههههه
احسن برده

أيوة أنا مش فاضية لوجع الدماغ ده ولا ايه رأيك ؟